Laçın rayonu üzrə 2016-cı ildə görülmüş işlərin yekunları və 2017-ci ildə qarşıda duran vəzifələrə həsr olunmuş ümumrayon yığıncağı keçirildi.
10 fevral 2017-ci il tarixdə Ağcabədi rayonu ərazisindəki Taxtakörpü qəsəbəsində Laçın rayonu üzrə 2016-cı ildə görülmüş işlərin yekunları və qarşıda duran vəzifələrə həsr olunmuş ümumrayon yığıncağı keçirildi. İclasdan əvvəl rayon rəhbərliyi və ictimaiyyət nümayəndələri Laçın Rayon İcra Hakimiyyətinin inzibati binası qarşısındakı ulu öndər Heydər Əliyevin büstünü ziyarət edərək önünə tər güllər düzdülər. Rayon ictimaiyyəti nümayəndələrinin iştirakı ilə davam edən yığıncaqda Laçın Rayon İcra Hakimiyyətinin başçısı Aqil Nəzərlinin məruzəsi dinlənildi. Məruzədə rayon rəhbəri əvvəlki illərdə olduğu kimi 2016-cı ildə də Azərbaycan Respublikasının Prezidenti cənab İlham Əliyevin apardığı düşünülmüş siyasət sayəsində ölkəmizdə dinamik inkişafın və davamlı sabitliyin qorunub saxlandığı, dövlətimizin beynəlxalq arenada nüfuzunun daha da artdığı bildirilməklə laçınlı məcburi köçkünlərin məskunlaşdıqları ərazilərdə də xeyli abadlıq və quruculuq işləri görüldüyü qeyd olundu. Məruzədə ötən il rayon sakinləri ilə yerlərdə 6139 nəfərin iştirak etdiyi 72 səyyar qəbul keçirildiyi, dinlənilmiş 629 müraciətdən 51 %-nin müsbət həll edildiyi, iş axtaran kimi müraciət edən 360 nəfər rayon sakinindən 63 nəfəri ixtisasına uyğun işlə, 66 nəfər isə işsizlik müavinəti ilə təmin edildiyi, 15 nəfərin özünüməşğulluq proqramına cəlb edilməklə, fiziki şəxslər tərəfindən yaradılan müəssisələrdə daxil olmaqla 205 yeni iş yeri açıldığı bildirildi. Həmçinin köçkülərin məskunlaşdıqları iki obada modul tipli müasir su təmizləyici qurğu quraşdırıldığı, ərazidə 45 km uzunluğunda çınqıl örtüklü avtomobil yolunun təmir edildiyi, 18 ədəd transformatorun əsaslı, 70 ədəd transformatorun isə cari təmir edilərək 30 min metr elektrik hava xətinin yenisi ilə əvəz edildiyi, iki məktəbin əsaslı, 10 məktəbin isə cari təmiri, habelə üç məktəbdə on ədəd modul tipli sinif otağının quraşdırıldığı bildirildi.
Diqqətə çatdırıldı ki, hesabat dövründə rayonun əhali və fermer təsərrüfatlarında 35 min 666 baş iri buynuzlu, 175 min 797 baş xırda buynuzlu heyvan, 5797 arı ailəsi olmaqla il ərzində rayon üzrə 24053 sentner ət, 205543 sentner süd, 4350 sentner yun və 1 milyon ədəd yumurta istehsal olunmuş, həmçinin cari ilin məhsulu üçün 234 hektar payızlıq buğda, 1398 hektar arpa sahəsi olmaqla 1632 hektar sahədə payız dənlilər səpilmiş, 1518 hektar sahədə biçin aparılmaqla sahələrdən orta məhsuldarlıq 28 sentner olmaqla 4183 ton buğda və arpa məhsulu əldə olunmuş, 2 ha sahədən 6 ton qarğıdalı, 32 ha sahədən 509.3 ton bostan-tərəvəz məhsulları istehsal edilmişdir.
Məruzə ətrafında çıxışlarda köçkünlər ölkə Prezidentinin uğurlu daxili və xarici siyasətini daim dəstəklədiklərini və onlara göstərdiyi davamlı qayğıya görə minnətdar olduqlarını bildirdilər.
Hesabat yığıncağında Azərbaycan Respublikası Prezidenti Administrasiyasının məsul əməkdaşı Ağaəli Əhmədov və Milli Məclisin deputatı Mahir Abbaszadə çıxış etdilər.
Sonda qərar layihəsi oxunaraq yığıncaq iştirakçıları adından ölkə Prezidenti cənab İlham Əliyevə müraciət qəbul olundu.
