Uşaq hüquqlarının müdafiəsi üzrə mütəxəssis hazırlığı məqsədilə təlim keçirilmişdir.

Azərbaycan Respublikası Prezidentinin 2020-ci il 27 noyabr tarixli, 2306 nömrəli Sərəncamı ilə təsdiq edilmiş “Uşaqlara dair Strategiyanın həyata keçirilməsi üzrə 2020-2025-ci illər üçün Fəaliyyət Planının icrası üçün Tədbirlər Planının 5.1.4-cü yarımbəndində uşaq hüquqlarının müdafiəsi üzrə ayrı-ayrı sahələrdə mütəxəssis hazırlığının təmin edilməsi tapşırığının həmicraçıları yerli icra hakimiyyəti orqanları müəyyən edilmişdir.

Həmin tapşırığın icrası ilə bağlı 2023-cü il 14 aprel tarixdə Laçın rayonundan olan məcburi köçkünlərin müvəqqəti məskunlaşdıqları Ağcabədi rayonunun Taxta Körpü qəsəbəsində uşaq hüquqlarının müdafiəsi üzrə ayrı-ayrı sahələrdə mütəxəssis hazırlığı məqsədilə təlim keçirilmişdir.  Uşaq hüquqlarının müdafiəsi sahəsində mütəxəssislərin hazırlanması məqsədilə Laçın Rayon İcra Hakimiyyəti başçısı yanında Yetkinlik yaşına çatmayanların işləri və hüquqlarının müdafiəsi üzrə Komissiya və Laçın Rayon İcra Hakimiyyətində fəaliyyət göstərən Monitorinq qrupu tərəfindən ərazidə fəaliyyət göstərən ümumtəhsil məktəblərinin psixoloqları təlimlərə cəlb edilmişdir.

Ərazidəki Laçın rayonunun Taxta Körpü köçkünlər qəsəbə tam orta məktəbinin binasında baş tutan tədbirdə uşaq hüquqlarının müdafiəsi üzrə mütəxəssis hazırlığı məqsədilə mühazirələr dinlənilmiş, belə təlimlərin digər ümumtəhsil məktəblərində də keçirilməsi zəruri hesab edilmişdir.

Tədbirdə çıxış edən Laçın Rayon İcra Hakimiyyəti başçısı aparatının aparıcı məsləhətçisi - Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Yusif Abdullazadə uşaq hüquqlarının müdafiəsi üzrə ayrı-ayrı sahələrdə mütəxəssis hazırlığının təmin edilməsi tapşırığının həyata keçirilməsi üçün təlimlərin və qısamüddətli kursların keçirilməsi ilə bağlı təqvim planının təsdiq edildiyini və bu istiqamətdə ardıcıl şəkildə müvafiq tədbilərin ilboyu davam etdiriləcəyini bildirmişdir.