Laçın şəhərində Azərbaycan Respublikası Dövlət Təhlükəsizliyi Xidmətinin Laçın Rayon Şöbəsinin açılışı olmuşdur.
8 Noyabr - Zəfər Günündə Dövlət Təhlükəsizliyi Xidmətinin Laçın Rayon Şöbəsinin inzibati binasının açılış mərasimi keçirilmişdir. Tədbirdə Şərqi Zəngəzur iqtisadi rayonuna daxil olan Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov, Dövlət Təhlükəsizliyi Xidmətinin rəhbər əməkdaşları, rayonun hüquq-mühafizə orqanlarının rəhbərləri iştirak etmişlər.
Əvvəlcə tədbir iştirakçıları binanın foyesində Ulu Öndər Heydər Əliyevin və Azərbaycan Respublikasının Prezidenti cənab İlham Əliyevin siyasi fəaliyyətlərinin müxtəlif dövrlərini özündə əks etdirən fotostendə baxmış, daha sonra müasir standartlara uyğun şəkildə yenidən rekonstruksiya edilmiş binada əməkdaşların öz xidmətlərini səmərəli təşkil etmələri və əməliyyat imkanlarını daima genişləndirə bilmələri üçün yaradılan hərtərəfli şəraitlə yaxından tanış olmuşlar.
Laçın şəhərində belə bir inzibati binanın istifadəyə verilməsinin Müzəffər Ali Baş Komandan cənab İlham Əliyevin təhlükəsizlik orqanlarına göstərdiyi diqqət və qayğının növbəti təzahürü olduğu vurğulanmış, Xidmətin şəxsi heyəti adından dövlət başçısına minnətdarlıq ifadə edilmişdir.
