Laçın rayonu üzrə 2024-cü ildə mülki müdafiə sahəsində görülmüş işlərin yekunlarına və 2025-ci ildə qarşıda duran vəzifələrə həsr edilmiş metodiki toplantı keçirilmişdir.

2024-cü il 17 dekabr tarixdə Laçın Rayon İcra Hakimiyyətinin və Fövqəladə Hallar Nazirliyinin Qarabağ Regional Mərkəzinin təşkilatçılığı ilə “Laçın rayonu üzrə 2024-cü ildə mülki müdafiə sahəsində görülmüş işlərin yekunları və 2025-ci ildə qarşıda duran vəzifələr” mövzusunda metodiki toplantı keçirilmişdir.

Toplantıda Laçın Rayon İcra Hakimiyyəti başçısı aparatında Ərazi idarəetmə və yerli özünüidarəetmə orqanları ilə iş şöbəsinin müdiri Cabir Əvəzzadə, Laçın Rayon İcra Hakimiyyəti başçısı aparatında Memarlıq və tikinti şöbəsinin müdiri Elsevər Yusifov, Fövqəladə Hallar Nazirliyinin Qarabağ Regional Mərkəzinin əməkdaşları, qəsəbə və kənd inzibati ərazi nümayəndələri, ərazidə fəaliyyət göstərən rayonun ümumtəhsil məktəblərinin direktorları, xidmət müəssisələrinin rəhbərləri iştirak etmişlər.

Toplantıda çıxış edən məsul şəxslər tədbirin əhəmiyyətindən bəhs edərək, mülki müdafiə sahəsində birgə fəaliyyətin vacibliyini vurğulamışlar.

Qarabağ Regional Mərkəzinin əməkdaşları müvafiq ərazidə mülki müdafiə sahəsində mövcud vəziyyət və problemlər, onların həlli yolları barədə ətraflı məlumat vermişlər.

Daha sonra Qarabağ Regional Mərkəzinin əməkdaşları mülki müdafiə sahəsində görülmüş işlərdən danışaraq, ərazidə yerləşən mülki müdafiə obyektlərində keçirilmiş monitorinqin nəticələri haqqında toplantı iştirakçılarını məlumatlandırmışlar. Qeyd olunmuşdur  ki, cari ilin təqviminə uyğun olaraq ərazidə yerləşən idarə və təşkilatlara mülki müdafiə üzrə metodiki köməkliklər göstərilmişdir.

Metodiki toplantının sonunda mövzu ilə bağlı müzakirələr aparılmış, suallar ətraflı şəkildə cavablandırılmışdır.