Laçın Rayon İcra Hakimiyyətində ailədaxili mübahisələrin həlli ilə bağlı mediasiya xidmətlərinin tətbiqinin genişləndirilməsi mövzusunda tədbir keçirilmişdir.
Azərbaycan Respublikası Prezidentinin 2023-cü il 28 avqust tarixli 4059 nömrəli Sərəncamı ilə təsdiq edilmiş “Azərbaycan Respublikasında sosial xidmətin inkişafına dair 2023-2026-cı illər üçün Dövlət Proqramı”nın icrası ilə bağlı Tədbirlər Planının 8.4.6-ci yarımbəndinin (Ailədaxili mübahisələrin həlli ilə bağlı mediasiya xidmətlərinin tətbiqinin genişləndirilməsi üçün müvafiq tədbirlər görülməsi) icrası əsas icraçı kimi Ailə, Qadın və Uşaq Problemləri üzrə Dövlət Komitəsi, digər icraçı kimi Əmək və Əhalinin Sosial Müdafiəsi Nazirliyi, Daxili İşlər Nazirliyi, Azərbaycan Respublikasının Mediasiya Şurası, yerli icra hakimiyyəti orqanlarına tapşırılmışdır.
Tapşırığın icrasının təmin edilməsi üçün Laçın Rayon İcra hakimiyyəti ailədaxili mübahisələrin həlli ilə bağlı mediasiya xidmətlərinin tətbiqinin genişləndirilməsi mövzusunda 2024-cü il 18 dekabr tarixdə tədbir keçirmişdir.
Tədbirdə Laçın Rayon İcra Hakimiyyəti başçısının birinci müavini Tofiq Mirzəyev, Ağdam 2 saylı mediasiya təşkilatının direktoru Aqil Cəfərov, Laçın Rayon İcra Hakimiyyətin əməkdaşları və inzibati ərazi dairəsi üzrə nümayəndələr iştirak etmişdir.
Laçın Rayon İcra Hakimiyyəti başçısının birinci müavini Tofiq Mirzəyev öz çıxışında ölkəmizdə mediasiya prosesinin tətbiqi və bu prosesin əhəmiyyəti haqqında danışmış, ailədaxili mübahisələrin həlli ilə bağlı mediasiya xidmətlərinin tətbiqinin genişləndirilməsi üçün yerlərdə mediasiya təşkilatının mediatorları tərəfindən təlimlərin, maarifləndirmə tədbirlərinin təşkilinin vacib olduğunu vurğulamışdır.
Ağdam 2 saylı mediasiya təşkilatının direktoru Aqil Cəfərov mediasiya haqqında, mediasiya təşkilatının vəzifə və səlahiyyətləri haqqında, təşkilata müraciət qaydaları haqqında ətraflı məlumat vermiş, tədbir iştirakçılarını maraqlandıran sualları cavablandırmışdır.
Şəhər, qəsəbə və kənd inzibati ərazi dairəsi üzrə nümayəndələrə ailədaxili mübahisələrin həlli ilə bağlı mediasiya xidmətlərinin tətbiqinin genişləndirilməsi bu xidmət haqqında daha çox insanın məlumatlı olması üçün maarifləndirmə tədbirlərinin keçirilməsi tapşırılmışdır.
