Laçın Rayon İcra Hakimiyyəti “ASAN Müraciət” informasiya sisteminə qoşulmuşdur
Azərbaycan Respublikası Prezidentinin 2020-ci il 21 avqust tarixli 2232 nömrəli Sərəncamının 1-ci hissəsinə əsasən ictimai xarakter daşıyan kommunal, yol və nəqliyyat problemləri, infrastrukturun cari təmiri, abadlaşdırılması və təmizliyi ilə bağlı şikayətlərin elektron xəritə üzərində qeyd edilməklə operativ surətdə aidiyyəti dövlət qurumlarına göndərilməsini və həmin şikayətlərə baxılmanın nəticələrinin izlənilməsini təmin edən “ASAN müraciət” informasiya sistemi yaradılması tapşırığı verilmişdir. Sərəncama əsasən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən “ASAN müraciət” informasiya sisteminin fəaliyyətinin təşkili, idarə olunması və təkmilləşdirilməsi məqsədi ilə sistem yaradılmış, mobil tətbiq istifadəyə verilmişdir.
“ASAN Müraciət” informasiya sistemi (AMİS) ictimai xarakter daşıyan kommunal, yol və nəqliyyat problemləri, infrastrukturun cari təmiri, abadlaşdırılması və təmizliyi üzrə nəzarətin həyata keçirilməsi məqsədi ilə müvafiq sahə ilə bağlı şikayətlərin elektron xəritə üzərində qeyd edilməklə operativ surətdə aidiyyəti dövlət qurumlarına göndərilməsini, həmin şikayətlərə baxılması ilə bağlı icraatın və baxılmanın nəticələrinin sistem üzərindən izlənilməsini təmin edir.
AMİS-in məqsədi problemlərin və çatışmazlıqların ictimaiyyətin daha geniş və fəal iştirakı ilə müəyyən edilməsi və aradan qaldırılmasının operativ qaydada həyata keçirilməsidir.
Laçın Rayon İcra Hakimiyyəti 11.01.2023-cü il tarixdə “ASAN Müraciət” informasiya sisteminə qoşulmuşdur.
AMİS-in fəaliyyəti aşağıdakı prinsiplər əsasında həyata keçirilir:
- istifadə rahatlığı– məlumat mübadiləsinin, eləcə də istifadəçilərin AMİS-dən istifadəsinin rahat və əlavə əməliyyatlar aparılmadan təmin edilməsi;
- sərbəstlik və fasiləsizlik– AMİS-in fəaliyyətinin fasiləsiz həyata keçirilməsi;
- funksionallıq və davamlı inkişaf–ən son texnologiyalardan istifadə edilməklə AMİS-in daim təkmilləşdirilməsi;
- operativlik– məlumat mübadiləsinin və AMİS-in funksiyalarının ən qısa müddətdə həyata keçirilməsi;
- şəffaflıq– AMİS-in fəaliyyətində aşkarlığın və hesabatlılığın təmin edilməsi.
AMİS-dən istifadə
AMİS-dən istifadə sistemin mobil tətbiqi üzərindən həyata keçirilir. İstifadəçi AMİS-dən qeyd edilən mobil tətbiqi mobil cihazına yükləyərək “ASAN Login” Vahid Giriş Sistemi vasitəsilə qeydiyyatdan keçir. “ASAN müraciət” mobil tətbiqində qeydiyyat zamanı mobil nömrə istifadəçinin öz adına deyilsə, şəxsiyyətin identikləşdirilməsi video qeydiyyat vasitəsilə aparılır. Qeydiyyat tamamlandıqdan sonra istifadəçi FİN və parolu daxil edərək sistemə giriş edə bilir.
İstifadəçi sistemə giriş etdikdən sonra AMİS tərəfindən avtomatik qaydada formalaşdırılan elektron kabinetində müraciətini elektron xəritə üzərində qeyd etməklə operativ surətdə göndərə və baxılmanın nəticəsini izləyə bilər.
Müraciətin göndərilməsi üçün istifadəçi tərəfindən problemin və çatışmazlığın foto və ya video görüntüsü, habelə müraciətin mətni və ya səsli mesajı elektron kabinetə daxil edilir, onun müşahidə (aşkar) edildiyi yer elektron xəritə üzərində qeyd edilərək “Göndər” düyməsi sıxılır.
Müraciətin göndərilməsi zamanı konkret ünvan üzrə digər istifadəçilər tərəfindən göndərilən müraciətlər istifadəçinin elektron kabinetində əks olunur. Həmin müraciətlərdə qeyd edilən məsələlər istifadəçinin müraciəti ilə eyni və ya oxşar olduğu halda istifadəçi sözügedən müraciətlərə qoşula və əlavələr edə bilər.
Mobil tətbiqi “Android” və “iOS” əməliyyat sistemlərindən yükləmək mümkündür:
“Android”: https://play.google.com/store/apps/details...
“iOS”: https://apps.apple.com/.../asan-m%C3%BCraci.../id1561571608
