Ağcabədi rayonunun Taxtakörpü ərazisində yeni salınmış 645 ailəlik üç qəsəbənin ikisində köçkünlərin yerləşdirilməsi üçün püşkatma keçirildi

   15 yanvar 2020-ci ildə Ağcabədi rayonunun Taxtakörpü ərazisində yeni salınmış 645 ailəlik üç qəsəbənin ikisində Qaçqınların və Məcburi Köçkünlərin İşləri üzrə Dövlət Komitəsi tərəfindən köçkünlərin yerləşdirilməsi üçün püşkatma keçirildi.
    Taxtakörpü ərazisində müvəqqəti məskunlaşmış məcburi köçkünlərin mənzil-məişət şəraitinin yaxşılaşdırılması üçün yeni qəsəbələrin salınması müvafiq Dövlət Proqramına Azərbaycan Respublikası Prezidentinin 2011-ci il 21 fevral tarixli 1346 nömrəli Sərəncamı ilə edilmiş əlavələrdə nəzərdə tutulub. Azərbaycan Respublikası Nazirlər Kabinetinin 2010-cu il 14 aprel tarixli Sərəncamı ilə həmin ərazidə 572 hektar torpaq sahəsi ayrılıb. Bunun da 134 hektarında birinci mərhələdə 645 ailə üçün 3 qəsəbə inşa edilib. Yeni qəsəbələrin layihələndirilməsi və tikintisi üzrə sifarişçi Azərbaycan Respublikasının Məcburi Köçkünlərin Sosial İnkişaf Fondudur.
   Qəsəbələrə Taxtakörpü ərazisindəki Vağazin, Qarakeçdi və Şeylanlı obalarında müvəqqəti məskunlaşmış məcburi köçkün ailələri köçürülür. Yeni salınmış qəsəbələr - Vağazin obasında 256 evdən, Qarakeçdi obasında 245 evdən, Şeylanlı obasında isə 144 evdən ibarətdir. Evlərin hər birinin 0,12 hektar həyətyanı sahəsi var. Üç qəsəbədə, ümumilikdə, bir otaqlı 62, iki otaqlı 260, üç otaqlı 260, dörd otaqlı 63 ev inşa edilib. Hər bir ev fərdi sanitar qovşağı ilə təchiz olunub. Qəsəbələrdə ikisi 192 yerlik, biri isə 108 yerlik olmaqla üç məktəb binası, inzibati bina, tibb məntəqəsi tikilib, müvafiq mühəndis-kommunikasiya şəbəkələri yaradılıb, abadlıq və yaşıllaşdırma işləri görülüb.
    Yeni qəsəbələrin elektrik təchizatını təmin etmək məqsədi ilə mövcud 330/110/10kV-luq "Ağcabədi" yarımstansiyasının 110 kV-luq Açıq Paylayıcı Qurğularında 110 kV-luq avadanlıqlar dəyişdirilməklə yenidənqurma işləri aparılıb, eyni zamanda, mövcud 110/10 kV-luq "Taxtakörpü" yarımstansiyanın ərazisində 35 kV-luq yeni Qapalı Paylayıcı Qurğu üçün bina tikilib. Qəsəbələrin qidalandırılması üçün 35 kV-luq ikidövrəli elektrik verilişi xətti çəkilib, 35/10 kV-luq yeni qapalı yarımstansiya inşa edilib, 6,3 MVA gücündə iki transformator, bundan əlavə, 400 kVA gücündə 10/0.4 kV-luq 11 ədəd komplekt transformator yarımstansiyası quraşdırılıb. Qəsəbələrin ərazisinin işıqlandırılması təmin olunub.
   Yuxarı Qarabağ kanalından magistral suverici kəmər vasitəsilə qəsəbələrin yaxınlığındakı su anbarlarına su vurulur. Burada iki hissəyə bölünən su ehtiyatının bir hissəsi içməli su təchizatı üçün su anbarları sahəsində yerləşən sudurulducu qurğuya nəql edilir, bir hissəsi isə həyətyanı sahələrin suvarılması üçün istifadə olunur.
Qəsəbədaxili su şəbəkələri üzərində 106 ədəd yanğın hıdrantları qoyulub. Ərazidəki qrunt sularının səviyyəsini aşağı salmaq məqsədilə qapalı drenaj şəbəkələri və qapalı suyığıcılar tikilib, 8 ədəd drenaj nasosu quraşdırılıb.
    Qəsəbələri təbii qaz təchiz etmək məqsədilə müvafiq işlər görülüb. Hər bir evdə qazla işləyən kombi tipli suqızdırıcılar quraşdırılıb. Məktəblərin və həkim məntəqəsinin istilik təchizatını təmin etmək məqsədi qəsəbələrin hər birində iki qazanxana tikilib. Hər bir qəsəbədə abadlıq işləri aparılıb, 19 ədəd sanitariya-təmizləmə meydançası tikilib və 2,3 hektar ərazidə yaşıllıqlar salınıb.
   Püşkatma mərasimində iştirak edən laçınlı məcburi köçkünlər yeni ilin ilk günlərində qəsəbələrin onların istifadəsinə verilməsini Azərbaycan Respublikasının Prezidenti cənab İlham Əliyevin və Birinci vitse-prezident Mehriban xanım Əliyevanın  məcburi köçkünlərə göstərdiyi diqqət və qayğının növbəti təzahürü olduğunu bildirərək, Ölkə başçısına və Mehriban xanıma bu diqqət və qayğıya görə dərin təşəkkürlərini, sonsuz minnətdarlıqlarını bildirmişlər.