Akademik Zərifə xanım Əliyevanın anadan olmasının 90 illik yubileyi qeyd olunmuşdur.

24  aprel  2013 – cü  il tarixdə Laçın  Rayon İcra Hakimiyyətinin təşkilatçılığı ilə  Laçınlı məcburi  köçkünlərin məskunlaşdıqları Ağcabədi  rayonu Taxta körpü qəsəbəsində  Zərifə xanım Əliyevanın anadan olmasının  90 illik   yubileyi ilə bağlı tədbir keçirilmişdir.
        Yığıncaqdan  əvvəl  rayon   ictimaiyyətinin   nümayəndələri  tərəfindən Ulu öndər Heydər Əliyevin  büstü  ziyarət  olunaraq,  önünə  gül dəstələri qoyulmuşdur. Sonra tədbir Rayon İcra Hakimiyyətinin inzibati  binasının akt zalında  davam etdirilmişdir.
        Yubiley  tədbirini   giriş sözü ilə Rayon İcra Hakimiyyətinin başçısı Akif Səlimov   açıq elan etdikdən sonra, Zərifə xanım Əliyevanın əziz xatirəsi bir dəqiqəlik  sükutla yad olunmuşdur. Rayon rəhbəri  Azərbaycan Respublikasının əməkdar elm xadimi, tibb elmləri doktoru, Azərbaycan  Elmlər  Akademiyasının akademiki  Zərifə Əziz qızı Əliyeva haqqında  məlumat verərək, ölkəmizdə və dünyada Zərifə xanım Əliyevanı tanıyanlar tərəfindən yubiley tədbirlərinin təntənə ilə qeyd olunduğunu bildirmişdir.
Yubiley tədbirində Zərifə xanım Əliyevanın 90 illik   yubileyi ilə əlaqədar  “İnsanlara nur bəxş edən ləyaqət  nümunəsi” mövzusunda məruzə dinlənilmişdir.                                                
Məruzə ətrafında çıxış edənlər gözəl ana, vəfalı ömür-gün yoldaşı, intellektual keyfiyyətləri  özündə  birləşdirən ziyalı Zərifə xanım Əliyevanın geniş biliyə malik olmasını, peşəsinə hədsiz məhəbbətini və insanlara daim xeyirxahlıq hissi ilə yanaşmasını  dərin məhəbbətlə xatırlamışlar.
Eyni zamanda bildirilmişdir ki, bu gün Zərifə xanım Əliyeva zərifliyi, xeyirxahlığı, insanpərvərliyi  onun övladları və nəvələri  tərəfindən daha geniş şəkildə davam etdirilir. Ulu öndər Heydər Əliyev və Zərifə xanım Əliyeva ocağının yetirməsi olan Möhtərəm Prezidentimiz cənab İlham Əliyevin müasir Azərbaycan dövlətinin çiçəklənməsi, tərəqqisi və dünyada tanıdılması istiqamətindəki yorulmaz fəaliyyəti isə hər bir azərbaycanlının qəlbində qürur və iftixar hissi yaradır. Yubiley tədbirində həmçinin bildirilmişdir ki,  ölkəmizdə və sərhədlərimizdən  kənarda Heydər Əliyev Fondunun Prezidenti, millət vəkili Mehriban xanım Əliyevanın həyata keçirdiyi geniş humanizm siyasəti isə Heydər Əliyev ideyalarının təzahürü olmaqla   bu ocaqdan qaynaqlanan insanpərvərliyin təcəssümüdür.
Sonra tədbirdə Zərifə xanım Əliyevanın 90 illik   yubileyi ilə əlaqədar rayonun  ümumtəhsil  məktəblərində   keçirlmiş inşa yazı  müsabiqəsinin  qalibləri Rayon İcra Hakimiyyəti tərəfindən mükafatlandırılmışdır.