“İnsan Hüquqları aylığı“ ilə bağlı tədbir keçirilmişdir.

2019-cu il 7 iyun tarixində Ağcabədi rayonu ərazisndəki  Taxta Körpü qəsəbəsində  Laçın Rayon İcra Hakimiyyətinin təşkilatçılığı ilə “İnsan Hüquqları aylığı“  ilə bağlı tədbir keçirilmişdir. Yeni Azərbaycan Partiyasının Laçın Rayon Təşkilatının inzibati binasının konfrans zalında başlayan tədbiri Laçın Rayon İcra Hakimiyyəti başçısı  aparatının Ərazi idarəetmə və yerli özünüidarəetmə orqanları ilə iş şöbəsinin müdiri Cabir Əvəzzadə giriş sözü ilə açaraq, gündəlikdə duran məsələ - Azərbaycan Respublikasının Prezidenti İlham Əliyevin 18 iyun 2007-ci il tarixli müvafiq Sərəncamı ilə hər il iyun ayının 18-nin ölkəmizdə İnsan Hüquqları Günü kimi qeyd olunduğunu, bununla yanaşı Azərbaycan Respublikasının İnsan Hüquqları Üzrə Müvəkkilinin təşəbbüsü ilə 18 İyun - “İnsan Hüquqları Günü” ərəfəsində respublikamızda  may ayının 18-dən 18 iyun tarixinədək elan edilmiş “İnsan Hüquqları aylığı” ilə bağlı yığıncaq  iştirakçılarına  məlumat  verərək, bu cür  maarifləndirmə  tədbirlərinin  həyata keçirilməsinin  əhəmiyyətini vurğulamış, dövlətimizin  insan hüquq və  azadlıqları  istiqamətində  gördüyü  tədbirlərin  beynəlxalq təşkilatlar  tərəfindən  yüksək  qiymətləndirilməsindən  bəhs  etmişdir. Natiq eyni zamanda ölkəmizin  tolerantlıq,  multikulturalizm,  islam  həmrəyliyi  ideyalarının dünyaya  yüksək  səviyyədə  çatdırılmasından  danışaraq,  insan  hüquqları  və  azadlıqları  sahəsində  əldə  edilmiş nailiyyətlərdən danışmışdır.
Tədbirdə “Azərbaycan dövləti daima insan hüquqlarının təminatçısıdır”  mövzusunda məruzə dinlənilmişdir.
Məruzə ətrafında çıxış edənlər bildirmişlər ki,  Azərbaycan dövlət müstəqilliyini bərpa etdikdən sonra insan hüquq və azadlıqlarının təmin edilməsi ölkəmizdə gedən böyük demokratik proseslərin tərkib hissəsi kimi dövlətin diqqət mərkəzində saxladığı prioritet məsələlərdən biri olmuşdur. Bu proseslərə  1993-cü ilin ikinci yarısından start verilmiş, Ulu öndər Heydər Əliyevin həyata keçirdiyi daxili və xarici siyasət nəticəsində bu hüquqlar gündəlik həyatımızda öz real təminatını almaqla yanaşı, həm də hüquqi normativ sənədlərdə öz əksini tapmışdır. Eyni zamanda bildirilmişdir ki, Ümummilli lider Heydər Əliyev insan hüquq və azadlıqlarının qorunmasını ali vəzifə kimi qarşıya qoymuş və bunu  prioritet prinsip hesab etmişdir.  Bu baxımdan 1993-cü ildən ölüm hökmü cəzası üzərində moratorium qoyulmasını, 1998-ci ildə isə bu cəzanın tamamilə ləğv edilməsini xüsusi ilə qeyd etmək lazımdır.
Sonda tədbir iştirakçılarını maraqlandıran suallara cavab verilmişdir.
Tədbirdə Dini Qurumlarla İş üzrə Dövlət Komitəsinin Ağcabədi bölgəsi üzrə şöbənin əməkdaşı Cavid Məlikzadə də iştirak etmişdir.