Respublikada “Ölkəmizi tanıyaq” devizi altında keçirilən tur-aksiyada Laçın rayon ümumtəhsil məktəblilərinin də iştirakı təmin olunmuşdur

     Ölkə Prezidenti cənab İlham Əliyevin tapşırığına əsasən respublikamızın ümumtəhsil məktəblərinin yuxarı sinif şagirdləri üçün “Ölkəmizi tanıyaq” devizi altında keçirilən tur-aksiyanın növbəti mərhələsində  Laçın rayon ümumtəhsil məktəblərinin  yuxarı sinif şagirdlərinin iştirakı da təmin olunmuşdur.
23 mart 2019-cu il tarixdə Laçın Rayon İcra Hakimiyyətinin Bakı şəhəri Nərimanov rayonu ərazisində fəaliyyət göstərən qərargahında Laçın Rayon İcra Hakimiyyətinin, rayonun təhsil işçiləri və valideynlərin iştirakı ilə məktəblilərdən ibarət qrupun Lənkəran-Masallı-Astara rayonları istiqaməti üzrə yola salınması mərasimi keçirilmişdir.
    Tədbirdə Rayon İcra Hakimiyyəti başçısının müavini Aynurə Həsənova "Ölkəmizi tanıyaq" layihəsinin əhəmiyyətindən danışaraq, tur-aksiyanın ölkəmizin tarixinin, mədəniyyətinin, adət-ənənələrinin, müstəqillik illərində əldə edilmiş nailiyyətlərinin ölkə gəncləri tərəfindən dərindən öyrənilməsində, onların  tədrisdə qazandıqları nəzəri biliklərin möhkəmləndirilməsində mühüm amillərdən olacağını, səfər zamanı ölkəmizin əraziləri ilə yaxından tanışlığın isə şagirdlərin mənəvi zənginliyini daha da artıracağını bildirmişdir.
       Təhsil işçiləri və valideynlər məktəblilərə səfərlə bağlı  tövsiyələrini verərək onlara mənalı istirahət, zəngin təəssüratla qayıtmalarını arzulamışlar.
Mərasim başa çatdıqdan sonra şagirdlər onlar üçün ayrılmış avtobusla cənub bölgəsinə yola düşüblər.