8 Noyabr - Zəfər bayramı laçınlılar tərəfindən böyük coşqu ilə qeyd edildi
2023-cü il 8 noyabr tarixində Laçın Rayonu İcra Hakimiyyətinin, rayonun idarə və müəssisələrinin müvəqqəti fəaliyyət göstərdiyi Ağcabədi rayonu Taxta Körpü qəsəbəsində Zəfər bayramına həsr olunmuş təntənəli tədbiri keçirilmişdir.
Laçın rayon İcra Hakimiyyətinin təşkilatçılığı ilə keçirilən tədbirdə Rayon İcra Hakimiyyətinin başçısı Aqil Nəzərli, rayonun hüquq-mühafizə orqanlarının rəhbərləri, şəhid ailələri, qazilər, veteranlar və çoxsaylı ictimaiyyət nümayəndələri iştirak edirdilər.
Tədbirdən əvvəl Rayon İcra Hakimiyyətinin başçısının və şəhid valideynlərinin, qazilərin iştirakı ilə Rayon İcra Hakimiyyətinin inzibati binası qarşısında ucaldılan Ümummilli lider Heydər Əliyevin büstünü, həmçinin qəsəbədəki Şəhidlərin Xatirə kompleksini ziyarət edərək hər iki abidə önünə tər qərənfillər düzmüş, əziz xatirələrini ehtiramla yad etmişlər.
Təntənəli bayram tədbiri Azərbaycan Respublikasının Dövlət Himninin səsləndirilməsi və ölkəmizin ərazi bütövlüyü uğrunda canını fəda etmiş şəhidlərin xatirəsinin bir dəqiqəlik sükutla yad olunması ilə başlandı.
Rayon rəhbərliyi tədbir iştirakçılarını möhtəşəm Zəfər münasibəti ilə təbrik edərək, Azərbaycan Respublikası Prezidenti, Müzəffər Ali Baş Komandan cənab İlham Əliyevin rəhbərliyi ilə Vətən Müharibəsində rəşadətli ordumuz tərəfindən torpaqlarımızın yağı düşməndən azad edilməsi ilə xalqımıza yaşadılan möhtəşəm Zəfər Bayramının bu gün bütün dünya azərbaycanlıları tərəfindən qürur hissi ilə qeyd etdikləri xüsusi ilə vurğulandı. Minnətdarlıq hissi ilə qeyd olunmuşdur ki, Ali Baş Komandan, cənab İlham Əliyevin rəhbərliyi altında Müzəffər Ordumuzun igidliyi, qəhrəmanlığı sayəsində torpaqlarımız, həmçinin 30 ilə yaxın həsrətində olduğumuz Laçın rayonu 1 dekabr 2020 ci il tarixdə işğaldan azad olundu. Bu gün Laçın azaddır. Artıq Böyük Qayıdış Planına əsasən yüzlərlə laçınlı ailəsi öz doğma şəhərinə qayıtmışdır
Bildirilmişdir ki, 2023-cü il sentyabrın 19-20 tarixlərində dövlətimiz tərəfindən Qarabağ ətrafında keçirilmiş antiterror əməliyyatı çərçivəsində erməni separatçılarının qalıqları cəmi 23 saat ərzində tamamilə təslim olmağa məcbur edilməsi nəticəsində ölkəmizin suverenliyinin tam təmin olunması Zəfər Bayramının 3-cü il dönümünü xüsusilə əlamətdar etmişdir . Artıq üçrəngli bayrağımız Xocalıda, Əsgəranda, Ağdərədə və Xankəndində qürurla dalğalanır.
Tədbirdə rayonun mədəniyyət kollektivlərinin ifasında Xalqımızın Möhtəşəm Qələbəsinə həsr olunmuş vətənpərvər musiqi nümunələri səsləndirilmişdir.
Tədbir hər bir iştirakçıda xoş təəssürat və yüksək əhval-ruhiyyə yaratmışdır.
