Səyyar həkim briqadası Laçın obalarında məcburi köçkünlərə tibbi xidmət göstərmişdir.

    02 - 03 iyul 2018-ci il tarixlərində Laçın Rayon İca Hakimiyyətinin təşkilatçılığı ilə  Laçın Rayon Mərkəzi Xəstəxanasının ixtisaslı həkimlərindən ibarət səyyar həkim briqadası  Ağcabədi rayonu Taxta Körpü ərazisindəki Malıbəy, Kamallı, Cağazur, Qarıqışlaq, Alxaslı, Mişni, Qozlu, Təzəkənd, Şeylanlı, Hacılar, Sadınlar, Qoşasu, Minkənd, Mirik,  Ağbulaq, Qarakeçdi, Vağazin kənd inzibati ərazi dairəsi üzrə nümayəndəliklərin sakinlərinin müvəqqəti məskunlaşdığı obalarda  olmuşlar.
    Laçın Rayon Mərkəzi  Xəstəxanasının  həkim  briqadasının  tərkibində iki terapevt,  iki ginikoloq, stomatoloq,   oftalmoloq və  pediatrın iştirakı təmin olunmuşdur. Keçirilmiş səyyar tibbi baxışın ilk günündə  74 nəfər, ikinci günündə isə 32 nəfər olmaqla cəmi 106 nəfər müayinə olunmuşdur. Müayinə  zamanı 17 xəstəyə yerində tibbi  yardım  göstərilmiş,  digərlərinə isə  müvafiq müalicə  təyin olunmuşdur.
  Bununla yanaşı səyyar tibbi baxış zamanı ərazidə müvəqqəti məskunlaşmış şəhid ailələri və Qarabağ əlillərinin mənzillərində olaraq onlardan ehtiyacı olanlara tibbi yardım göstərilmiş və zəruri dərman preparatları verilmişdir.
Məcburi köçkünlər isti yay günlərində müvəqqəti məskunlaşdıqları ərazidə onlarla görüşlərin keçirilməsini və səyyar həkim briqadası tərəfindən müayinə və müalicə olunmalarını razılıqla qarşılamış, bu qayğıya görə  tədbirin təşkilatçılarına və səyyar həkim briqadasına minnətdarlıqlarını bildirmişlər.
     Səyyar həkim briqadası tərəfindən tibbi xidmətin isti yay günlərində davam etdirilməsi nəzərdə tutulmuşdur.