Ulu öndər Heydər Əliyevin anadan olmasının 95-ci ildönümü münasibəti ilə tədbir keçirilmişdir.

      10 may 2018-ci il tarixdə laçınlı məcburi köçkünlərin  müvəqqəti məskunlaşdıqları Ağcabədi rayonunun Taxta Körpü qəsəbəsində Azərbaycan xalqının Ümummilli lideri Heydər Əliyevin anadan olmasının 95-ci ildönümü qeyd edilmişdir. Əvvəlcə   çoxsaylı rayon ictimaiyyəti nümayəndələri, qəsəbə sakinləri tərəfindən  Laçın Rayon İcra Hakimiyyətinin qarşısında  Ulu öndər Heydər Əliyevin əziz xatirəsinə ucaldılmış büstü ziyarət olunaraq, önünə  gül dəstələri düzülmüşdür. Tədbir iştirakçıları tərəfindən qəsəbə ərazisindəki “Heydər Parkı”nda həmişəyaşıl ağaclar əkildikdən sonra tədbir Laçın Rayon İcra Hakimiyyətinin iclas zalında davam etdirilmişdir. Tədbir Dövlət Himninin səsləndirilməsi ilə açıq elan edildikdən sonra Laçın Rayon İcra Hakimiyyətinin başçısı Aqil Nəzərli giriş nitqində  Ümummilli liderin keçdiyi şərəfli həyat yolundan və  çoxşaxəli fəaliyyətindən danışaraq, məhz dahi şəxsiyyətin qətiyyəti, cəsarəti və uzaqgörənliyi nəticəsində Azərbaycanda ictimai-siyasi sabitliyə nail olunduğunu, dövlətçiliyimizin məhv olmaq təhlükəsindən xilas edildiyini, Ulu öndərin hakimiyyəti dövründə respublikamızın ictimai-siyasi, iqtisadi və mədəni-mənəvi tərəqqisində misilsiz nailiyyətlər qazanıldığını bildirmişdir.
     Sonra tədbirdə Laçın Rayon İcra Hakimiyyəti başçısının birinci müavini Tofiq Mirzəyevin  Ümummilli lider Heydər Əliyevin zəngin və şərəfli ömür yolunu əks etdirən geniş məruzəsi, həmin məruzə ətrafında çıxışlar dinlənilmişdir. Məruzə və çıxışlarda əvəzedilməz Heydər Əliyev strategiyasının Müstəqil Azərbaycanın inkişaf yolu olacağına əminlik  vurğulanmaqla, bu siyasətin ölkə Prezidenti cənab İlham Əliyev tərəfindən uğurla davam etdirildiyi  bildirilmişdir.
Ulu öndər Heydər Əliyevin anadan olmasının 95-ci ildönümü münasibətilə Laçın Rayon İcra Hakimiyyətinin tədbirlər planına uyğun olaraq, məktəblilər və gənclər arasında  keçirilən futbol və voleybol yarışlarının qaliblərinə kubok, fəxri fərman və qiymətli hədiyyələr  təqdim olunmuşdur.
      Sonda Ulu öndər Heydər Əliyevin həyat və fəaliyyətindən bəhs edən videoçarxa tamaşa edilmişdir.