Laçınlılar "Qan ver, yaşat" adlı qanvermə aksiyasında fəal iştirak etmişlər.
Ağcabədi rayonunun Taxtakörpü qəsəbəsi ərazisində fəaliyyət göstətən Laçın Rayon Mərkəzi Xəstəxanasının Poliklinika şöbəsində 26.12.2017-ci il tarixdə Laçın Rayon Mərkəzi Xəstəxanası və B.Eyvazov adına Elmi Tədqiqat Hematologiya və Transfuziologiya İnstitutunun Mərkəzi Qan Bankının Bərdə bölməsi ilə birgə "Qan ver, yaşat "adlı qanvermə aksiyası həyata keçirmişdir. Aksiya 31 - Dekabr Dünya Azərbaycanlılarının Həmrəylik Günü və Yeni İl bayramı münasibəti ilə təşkil olunmuşdur.
Aksiyada Laçın Rayon İcra Hakimiyyətinin başçısı Aqil Nəzərli iştirak etmiş, qan vermək üçün gələn məcburi köçkünlərlə görüşmüş, ilk olaraq aksiyanın iştirakçısı olmuşdur. Rayon rəhbəri çıxışında toplanmış qanın ehtiyacı olan neçə-neçə xəstəyə kömək edəcəyini bildirərək, bu cür tədbirin keçirilməsini yüksək qiymətləndirmişdir.
Məlumat verilmişdir ki, toplanan qan hemofiliya, talasemiya və digər xəstəliklərdən əziyyət çəkən xəstələrin qanla təmin olunmasında istifadə olunacaqdır.
Qanvermə aksiyasında Rayon İcra Hakimiyyətinin işçiləri, idarə və müəssisələrin əməkdaşları, məcburi köçkünlər yüksək əhval-ruhiyyə ilə iştirak etmiş, fəallıq nümayiş etdirmişlər.
