Qəsəbədaxili avtomobil yolları təmir edilir.
Ağcabədi rayonunun Taxtakörpü ərazisində laçınlı məcburi köçkünlərin müvəqqəti məskunlaşdıqları 552 ailəlik qəsəbə ilə 37 ailəlik qəsəbələrarası və həmin qəsəbələrin daxili avtomobil yollarında Laçın Rayon İcra Hakimiyyətinin yaxından dəstəyi və təşkilatçılığı ilə cari təmir və bərpa işlərinə başlanılmışdır. Görüləcək işlərlə əlaqədar əvvəlcə rayonun aidiyyəti qurumlarının mütəxəssisləri tərəfindən ərazidəki küçə və yollara baxış keçirilmiş, yolun daha çox təmirə ehtiyac olan hissələri müəyyənləşdirilmişdir. Qəsəbədaxili avtomobil yollarının uzunluğu 14 km olmaqla 2012-ci ilin əvvəllərində istifadəyə verilmişdir.
2017-ci il 8 avqust tarixdən başlayaraq müəyyən təmiri vacib hesab olunmuş qəsəbədaxili avtomobil yollarında hissə-hissə təmir və bərpa işlərinə başlanılmışdır. 56 saylı Laçın Yol İstismar MMC tərəfindən həyata keçirilən təmir işlərinə idarənin işçi qüvvəsi, habelə müvafiq maşın və mexanizmləri cəlb edilmişdir. Daxili imkanlar hesabına əraziyə gətirilən 70 kubdan çox qum və çınqıl örtük 552 ailəlik qəsəbə ilə 37 saylı qəsəbəarası yolun sıradan çıxmış hissəsinə, həmçinin qəsəbənin ayrı-ayrı küçələrində ehtiyac olan yerlərə tökülərək, qreyderlə yayılaraq hamarlanmışdır. Görülmüş işlər nəticəsində yolun sıradan çıxmış 1,7 km hissəsi bərpa edilmişdir.
Əhalinin və nəqliyyat vasitələrinin qəsəbədaxili avtomobil yollarında rahat hərəkətinin təmin edilməsi və görülən təmir-bərpa işləri qəsəbə sakinləri tərəfindən razılıqla qarşılanmışdır. Hazırda həmin avtomobil yollarında lazımi təmir işləri davam etdirilir
