Laçın Rayon İcra Hakimiyyəti başçısının növbəti görüş-səyyar qəbulu Füzuli rayonu ərazisində məskunlaşmış laçınlı məcburi köçkünlərlə keçirilmişdir.

           23 fevral 2017-ci il tarixdə Laçın Rayon İcra Hakimiyyətinin başçısı Aqil Nəzərlinin  Füzuli rayonu, Gecəgözlü kənd tam orta məktəbinin binasında  həmin ərazidə müvəqqəti məskunlaşmış laçınlı köçkünlərlə səyyar qəbul – görüşü keçirildi. Rayon İcra Hakimiyyətinin başçısı  görüşdə çıxış edərək ölkə Prezidenti cənab İlham Əliyevin rəhbərliyi altında ölkəmizdə, eləcə də məcburi köçkünlərin məskunlaşdıqları ərazilərdə həyata keçirilən geniş quruculuq və abadlıq işlərindən, həmçinin məcburi köçkünlərin həyat şəraitinin yaxşılaşdırılması istiqamətində görülmüş və görüləcək işlərdən danışdı. Rayon rəhbəri çıxışında  xüsusilə vurğuladı ki, dünyada tüğyan edən  kəskin maliyyə böhranın ölkəmizdən də yan keçmədiyi bir vaxtda ölkə başçısı tərəfindən  qaçqın və məcburi köçkünlərə  verilən müavinətin  2017-ci il 23 yanvar tarixli Fərmanla  bir daha artırılarq ödənişinin  sadələşdirilməsi, həmçinin fərdi qaydada təbii qazla təmin olunmayan köçkünlərin müvəqqəti məskunlaşma yerlərində elektik enerjisi və digər kommunal ödənişlərin 2017-ci il 01 fevral tarixdən dövlət hesabına ödənilməsi barədə Fərmanını köçkünlərə olan davamlı diqqət və qayğısının təzahürü olduğunu qeyd edərək, köçkünlər adından ölkə Prezidentinə  təşəkkür və minnətdarlığını bildirdi.
          EynI zamanda rayon rəsmisi  Azərbaycan Respublikasının Prezidenti,  Ali Baş Komandan cənab İlham Əliyevin rəhbərliyi  altında düşmən nəzarətindən azad edilmiş Cəbrayıl rayonunun Cocuq Mərcanlı kəndinin bərpasına başlanmasını cəbrayıllılar kimi bütün köçkünlərdə yüksək əhval-ruhiyyə yaratdığını, bunun  ata-baba yurdlarımıza “Böyük Qayıdış”ın təməli olacağına və növbəti bərpa işlərinin  Laçında, Şuşada, Kəlbəcərdə və digər işğaldan azad olunacaq torpaqlarımızda  həyata keçiriləcəyinə əminliyini bildirdi.       
         Qəbulda iştirak edən  40-dan  vətəndaşdan 8 nəfəri çıxış etmiş, müxtəlif məsələlərlə bağlı müraciətləri dinlənilmişdir. Məcburi köçkünlər rayon rəhbərliyi tərəfindən mütəmadi olaraq keçirilən görüşlərdən razı qaldıqlarını bildirmişlər. Vətəndaşların müraciətləri rayon rəhbəri tərəfindən  ayrı-ayrılıqda dinlənilmiş həmin məsələlərin həlli ilə bağlı  aidiyyatı struktur rəhbərlərinə göstərişlər verilmiş, bəzi  məsələlər isə araşdırılması üçün qeydiyyata alınmışdır.
       Səyyar qəbul - görüşdə Rayon İcra Hakimiyyəti başçısı aparatının məsul işçiləri və aidiyyəti idarə  rəhbərləri iştirak etmişlər.