31 mart azərbaycanlıların soyqırımı günü ilə bağlı tədbir keçirilmişdir

31  mart 2016-cı il tarixdə Rayon İcra  Hakimiyyətinin təşkilatçılığı ilə  Taxta körpü  qəsəbəsində  geniş rayon ictimaiyyətinin  nümayəndələrinin iştirakı ilə  azərbaycanlıların   soyqırımı günü ilə bağlı  ümumrayon toplantısı keçirilmişdir. Əvvəlcə laçınlılar  “Şəhidlərin xatirə  kompleksi”ni  ziyarət etmiş, önünə gül dəstələri  qoymuşlar.
Sonra tədbir Rayon İcra Hakimiyyətinin  inzibati  binasının  konfrans zalında davam etdirilmişdir. Soyqırım  qurbanlarının  xatirəsi bir  dəqiqəlik  sükutla  yad olunduqdan sonra, Rayon İcra Hakimiyyətinin başçısı səlahiyyətlərini müvəqqəti icra edən  Aqil Nəzərli  31 Mart Azərbaycanlıların soyqırımı ilə bağlı mərasim iştirakçılarına məlumat  vermiş və erməni millətçiləri tərəfindən xalqımıza qarşı keçirilən soyqırım və təcavüz siyasətinə  Ulu Öndər Heydər Əliyevin hakimiyyətə gəlişindən sonra hüquqi qiymət verildiyini  bildirmiş, bununla bağlı 26 mart 1998-ci il tarixli sərəncamın tarixi əhəmiyyət daşıdığını qeyd etmişdir. Eyni  zamanda   rayon rəhbəri bildirmişdir ki, erməni  millətçilərinin   törətdiyi  soyqırım  kimi cinayətləri dünya  dövlətlərinin  parlamentləri, beynəlxalq  təşkilatları tərəfindən tanınmasına Prezident İlham Əliyevin ölkədə apardığı  çoxşaxəli  siyasət  sayəsində nail  olunmuşdur.  Tədbirdə çıxış edən rayon  ictimaiyyətinin nümayəndələri də   Azərbaycanlıların kütləvi surətdə qırğına, repressiyalara məruz  qalmalarını, doğma yurdlarından sürgün edilmələrini  və didərgin salınmasını  XX əsr tarixinin ən faciəli və dəhşətli hadisələri olduğunu bildirmişlər. Lakin hazırda Ulu Öndər Heydər  Əliyevin  siyasətinin layiqli davamçısı, ölkə Prezidenti İlham Əliyevin apardığı uğurlu  daxili və xarici siyasət nəticəsində işğalda olan torpaqlarımızın azad ediləcəyinə və tezliklə torpaqlarımıza qayıdacaqlarına əminliklərini  bildirmişlər.