Xocalı faciəsinin 24-cü ildönümü ilə bağlı anım mərasimi keçirilmişdir

Xocalı  faciəsinin 24-cü ildönümü ilə bağlı Laçın Rayon İcra Hakimiyyəti başçısı aparatında  tərtib edilmiş tədbirlər planına uyğun olaraq fevral ayının əvvəlindən rayonun idarə, müəssisə və təşkilatlarında,  həmçinin kənd  icra  nümayəndəliklərində,  bütün ümumtəhsil məktəblərində  Xocalı soyqırımının  iyirmi dördüncü  ildönümünə həsr olunmuş  tədbirlər   keçirilmiş, milli azadlıq  uğrunda  mübarizəyə  həsr olunmuş  sənədli  və bədii filmlərin  nümayişi  təşkil edilmiş, rayonun bütün tədris  müəssisələrində fevralın 26-da  Xocalı   faciəsinə  həsr  edilmiş  xüsusi  dərsin aparılması  təmin olunmuşdur.                                                             
26 fevral 2016-cı il tarixdə isə Rayon İcra   Hakimiyyətinin təşkilatçılığı ilə  Taxta körpü ərazisində  fəaliyyət  göstərən idarə və müəssisələrin, ərazidə fəaliyyət göstərən bütün məktəblərin iştirakı ilə  “Şəhidlərin xatirə  kompleksi”nin qarşısında  geniş ümumrayon anım mərasimi keçirilmişdir. Əvvəlcə XX əsrin ən ağır faciəsi kimi tarixə düşən Xocalı soyqırımı  zamanı şəhid olan bütün soydaşlarımızın əziz xatirəsi bir dəqiqəlik sükutla yad edilmiş, “Şəhidlərin xatirə  kompleksi” ziyarət olunmuş, önünə gül dəstələri  qoyulmuşdur.
Sonra Rayon Mədəniyyət Mərkəzində davam edən tədbirdə çıxış edən rayon rəhbəri Akif Səlimov Xocalı faciəsinin baş verdiyi tarixi məqama nəzər salaraq, ermənilər tərəfindən dinc əhaliyə qarşı törədilmiş bu vəhşiliyin təkcə azərbaycanlılara qarşı deyil eyni zamanda bütün bəşəriyyətə qarşı törədilmiş qatı cinayət olduğunu bildirmişdir. Rayon İcra Hakimiyyəti başçısı o zamanki Respublika rəhbərliyinin bu dəhşətli faciəyə ögey münasibətini qeyd etməklə faciənin real qiymətinin Ulu öndər Heydər Əliyev tərəfindən verildiyini  və bu qətliamın  dünya ictimaiyyətinə çatdırılmasında başladığı tarixi missiyanın bu gün də ölkə Prezidenti İlham Əliyev  tərəfindən uğurla davam olunduğunu, artıq dünyanın onlarla ölkəsinin faciəni soyqırımı kimi tanımasını, yağı düşmən tapdağı altındakı torpaqlarımızın azad edilməsi istiqamətində görülən işlərdən ətraflı danışaraq hər bir azərbaycanlı vətəndaşının narahat şəhid ruhları qarşısında borclu olmaqla hər an mübarizəyə hazır olmalarını xüsusi ilə qeyd etmişdir.
Anım mərasimində faciəni öz gözləri ilə görmüş rayon sakinləri o qanlı gecəni erməni faşizminə qarşı nifrətlə xatırlayaraq həmin hadisəni heç zaman hafizələrindən silinmədiyini mərasim iştirakçılarına bildirməklə bu hadisələrin bir daha təkrarlanmaması üçün Ali Baş komandanın ətrafında sıx birləşərək hər bir ailədə xüsusilə gənclər arasında vətənpərvərlik hisslərinin gücləndirilməsini vurğulamışlar.
Tədbirdə Xocalı soyqırımına həsr edilmiş “Xoca” filmi nümayiş etdirilmişdir.
Eyni zamanda 26 fevral 2016-cı il tarixdə  Bakı şəhərində və Respublikanın digər rayonlarında  Şəhidlərin abidə kompleksləri laçınlı  sakinlər tərəfindən  ziyarət olunmuşdur.
   Tədbirlər  Planına uyğun olaraq 26 fevral  günü  saat 17:00-da rayon  sakinlərinin  məskunlaşdıqları ərazilərdə faciə qurbanlarının   xatirəsi   bir  dəqiqəlik sükutla yad edilməsi təşkil olunmuşdur.