Laçın rayonu üzrə 2015-ci ilin 9 ayında görülmüş işlərə və qarşıda duran vəzifələrə dair Şuranın geniş iclası keçirilmişdir.
19 oktyabr 2015-ci il tarixdə Laçın Rayon İcra Hakimiyyətində rayon ictimaiyyəti nümayəndələrinin iştirakı ilə Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2015-ci ilin 9 ayının sosial-iqtisadi inkişafının yekunlarına həsr olunmuş iclasından irəli gələn vəzifələrlə əlaqədar Laçın rayonunda görülmüş işlər və qarşıda duran məsələlərlə bağlı Laçın Rayon İcra Hakimiyyəti başçısı yanında Şuranın geniş iclası keçirilmişdir. Əvvəlcə rayon ictimaiyyəti nümayəndələri tərəfindən Rayon İcra Hakimiyyətinin inzibati binası qarşısında ucaldılmış Ulu öndər Heydər Əliyevin büstünü ziyarət edilmiş və büstün önünə gül dəstələri qoyulmuşdur.
İclası giriş sözü ilə açan Rayon İcra Hakimiyyətinin başçısı Akif Səlimov gündəlikdə duran məsələ ilə bağlı məlumat vermişdir. Laçın rayonunda cari ilin 9 ayında görülən işlər və qarşıda duran vəzifələr haqqında hazırlanmış məruzədə Möhtərəm ölkə Prezidentinin rəhbərliyi altında respublikada və rayonda görülmüş işlər, əldə olunmuş nailiyyətlər ətraflı təhlil edilmişdir. Həmçinin məruzədə bildirilmişdir ki, hesabat dövründə 38 şəhər və rayonda 59 səyyar qəbul keçirilmiş, 4731 nəfərin iştirak etdiyi bu qəbullarda 531 nəfər, Rayon İcra Hakimiyyəti başçısı aparatında isə 2487 nəfər rayon sakininin müraciətləri dinlənilmiş, onların mənzil-məişət şəraitləri ilə yaxından tanış olunmuş, həlli mümkün olan məsələlərin həyata keçirilməsi üçün aidiyyəti rayon təşkilatlarına göstərişlər verilmişdir. Rayon İcra Hakimiyyəti başçısı yanında 19 şura iclası keçirilmiş cari məsələlər dərindən təhlil edilmişdir. Eyni zamanda bildirilmişdir ki, hesabat dövründə Fingə obasında 4.4 km, Şeylanlı obalarında 5.6 km, Sadınlar-2 obasında 4.1 km və Qarakeçdi İnçalan obasında 8.1 km uzunluğunda çınqıl örtüklü avtomobil yolu çəkilmişdir. Azərbaycan Respublikası Ekologiya və Təbii Sərvətlər Nazirliyinin layihəsi əsasında əhalini içməli su ilə təmin etmək məqsədi ilə Mişni və Qarıqışlaq obalarında yeni modul tipli su təmizləyici qurğunun tikintisinə başlanılmış, obadaxili su xətləri çəkilmiş, hər iki obada müasir standartlara cavab verən su təmizləyici qurğular əhalinin istifadəsinə verilmişdir. Rayonun daxili imkanı hesabına Vağazin obasında 640 m uzunluğunda avtomobil yolu əsaslı təmir edilmişdir.
Məruzədə şəhid, əlil və imkansız ailələrə müxtəlif ərzaq yardımlarının verilməsi, səyyar qəbulların mütəmadi keçirilməsi, əhalinin içməli su təminatının yaxşılaşdırılması, təsərrüfat suyu və fasiləsiz elekrti enerjisi ilə təmin olunması məsələləri ətraflı danışılmışdır. Şura iclasında Rayon Təhsil Şöbəsinin, Rayon Mədəniyyət və Turizm Şöbəsinin, Rayon Mərkəzi Xəstəxanasının rəhbərləri, Ağcabədi rayon Mənzil Kommunal İstisamar sahəsinin rəisi və Laçın Rayon İcra Hakimiyyəti başçısının Fərraş kənd inzibati ərazi dairəsi üzrə nümayəndəsi çıxış etmişdir.
İclasda müzakirə olunan məsələlərlə bağlı müvafiq qərar qəbul olunmuşdur.
