Modul tipli su təmizləyici qurğular istifadəyə verildi

Azərbaycan Respublikasının Prezidenti cənab İlham Əliyevin müvafiq Sərəncamına əsasən  Ekologiya və Təbii Sərvətlər Nazirliyi tərəfindən Kür-Araz  boyu əhalinin ekoloji cəhətdən təmiz su ilə təmin edilməsi məqsədilə modul tipli su təmizləyici qurğuların quraşdırılması layihələri çərçivəsində 2014-cü ildə Laçın rayonunun Mişni kəndindən olan məcburi köçkünlərin müvəqqəti məskunlaşdıqları Ağcabədi rayonunun Taxtakörpü ərazisindəki Mişni obasının və  Qarıqışlaq  kəndindən olan məcburi köçkünlərin müvəqqəti məskunlaşdıqları Qarıqışlaq obasının hər birində ayrı-ayrılıqda su təmizləyici qurğuların tikintisinə başlanılmış, cari ilin avqust ayında həmin obyektlərin tikintisi tam şəkildə başa çatdırılmışdır.
Bununla əlaqədar olaraq ictimaiyyət nümayəndələrinin iştirakı ilə 2015-ci il 8 sentyabr tarixdə əvvəlcə Qarıqışlaq obasında, daha sonra isə Mişni obasında inşa olunmuş modul tipli su təmizləyici qurğuların istifadəyə verilməsi ilə bağlı açılış tədbirləri keçirilmişdir.
Hər iki tədbirdə  çıxış edən Laçın  Rayonu  İcra  Hakimiyyəti  başçısı Akif Səlimov Ölkə Prezidenti cənab İlham Əliyevin rəhbərliyi altında  ölkədə və rayonda aparılan geniş quruculuq və abadlıq işlərindən, ayrı-ayrı sahələrdə əldə edilmiş uğurlardan, məcburi köçkünlərin problemlərinin həlli, mənzil-məişət şəraitlərinin yaxşılaşdırılması istiqamətində həyata keçirilən tədbirlərdən söz açmışdır.
Tədbirlərdə Ekologiya və Təbii Sərvətlər Nazirliyinin regional idarəsinin əməkdaşları da iştirak etmişlər.
Məcburi köçkünlər onlara göstərilən davamlı diqqət və qayğıya görə Ölkə Başçısı cənab İlham Əliyevə minnətdarlıq bildirmişlər.