Zərifə xanım Əliyevanın anadan olmasının 92-ci ildönümünə həsr olunmuş intellektual yarışın regional seçim mərhələsində Laçın rayonunu təmsil edən komanda ikinci yeri tutmuşdur

Azərbaycanın əməkdar elm xadimi, tibb elmləri doktoru, akademik,  oftalmoloq alim, fədakar ana Zərifə xanım Əliyevanın doğum günü yaxınlaşır.  İnsanlara  təmənnasız sevinc bəxş edən Zərifə xanım vəfalı, sədaqətli  ömür-gün yoldaşı, humanist, alicənab bir qadın kimi hər bir azərbaycanlının yaddaşında daim yaşayır. Xalqımız qəlblərdə dərin iz salmış bu müdrik insanın nurlu xatirəsini həmişə əziz tutur. Hər il bu münasibətlə müxtəlif dövlət qurumları tərəfindən fərqli formada tədbirlər keçirilir.
Ailə, Qadın və Uşaq Problemləri üzrə Dövlət Komitəsinin təşkilatçılığı ilə Zərifə xanım Əliyevanın anadan olmasının 92-ci ildönümünə həsr olunmuş respublika üzrə intellektual yarış keçiriləcəkdir. Bu məqsədlə 7 regionda 53 şəhər və rayonu təmsil edən komandaların iştirakı ilə regional seçim turları keçirilir.
Növbəti regional seçim turu 2015-ci il 9 aprel tarixdə Abşeron rayonunun Masazır qəsəbəsində məcburi köçkünlər üçün salınmış yeni yaşayış massivində - Zəngilan rayon Mədəniyyət Evində  Sumqayıt şəhəri, Laçın, Zəngilan, Şuşa, Cəbrayıl, Qubadlı, Xocavənd rayonlarını təmsil edən komandaların iştirakı ilə seçim mərhələsi keçirilmişdir. Seçim mərhələsində  Laçın rayonunu təmsil edən 6 nəfər məktəblidən ibarət  komanda II yeri tutmuşdur.