“İctimai davranış qaydalarının təbliğinə məktəbdən başlayaq” layihəsi Laçın məktəbində uğurla sona çatdı!

28 noyabr  2014-cü il tarixində  fərdi şəxs qismində Nərgiz Vəliyeva Azərbaycan Gənclər Fondunun maliyyə dəstəyi ilə həyata keçirilən iki  aylıq “Ictimai davranış qaydalarının təbliğinə məktəbdən başlayaq!” layihəsi çərçivəsində üçüncü  təlimini həyata keçirərək layihəyə uğurla yekun vurmuşdur.
Layihə çərçivəsində üçüncü təlim Sumqayıt şəhəri, Avtomobil məktəbi həyətində yerləşən 5 saylı Laçın rayon  tam orta  məktəbində həyata keçirildi.
Tədbirin açılışında giriş nitqi edərək  layihənin rəhbəri Nərgiz Vəliyeva vurğuladı ki, uzun müddət sovet ideologiyası ilə yaşadıqdan sonra müstəqillik  qazanan zamandan bəri milli dəyərlərimizin  düzgün, effektiv şəkildə aşılanmaması, keçid dövrünü yaşamağımız,  1 milyona yaxın  qaçqın və məcburi köçkün problemi ictimai davranış qaydalarında pozuntulara gətirib çıxardıb. Həmçinin  Bakı və ətrafının urbanizasiyalaşması prosesi, kənd  və rayon yerlərindən işsiz qalan əhalinin şəhərə iş dalınca üz tutması,  kənd və şəhər  ictimai davranış qaydalarının, dəyərlərinin  bir-birinə çulğaşması prosesi daha da mürəkkəbləşdirdi. Lakin getdikcə güclənən dövlətimiz və iqtisadiyyatımız fonunda Azərbaycanın Qərbə  inteqrasiyası  zamanında, bir dövlət kimi güclənməsi, dünya birliyinin, beynəlxalq ictimaiyyətin bir üzvü olması onun mədəni dəyərlərinin təcəssümünü tələb edir. Bu baxımdan layihənin əsas məqsədi  gələcəkdə gənc mədəni, sivil nəsil formalaşdırılmasına nail olmaqdır.
Layihənin təlimçisi Aytən Qurbanova  ilk təlim çərçivəsində Sumqayıt şəhəri, Avtomobil məktəb həyətində yerləşən 5 saylı Laçın rayon  tam orta  məktəbinin yuxarı sinif şagirdlərinə  ictimai nəqliyyatda davranış qaydaları, cəmiyyətdə salamlaşma, tanışlıq, xahiş, üzr istəmə kimi davranış və etiket qaydaları haqqında, həmçinin süfrə mədəniyyəti, kafe, restoran, parkda, xidmət və iaşə obyektlərdə davranış qaydaları  ilə bağlı şagirdlərə geniş məlumat vermiş və qarşılıqlı müzakirələr aparmışdır. Təlim çərçivəsində şagirdlərə layihə çərçivəsində çap olunan “İctimai davranış qaydalarının təbliğinə məktəbdən başlayaq” kitabı hədiyyə edilmişdir. Kitabda yuxarıda qeyd olunan və əlavə mövzular geniş işıqlandırılmışdır.
Başda məktəbin direktoru Əzizov Əlipolad  olmaqla  5 saylı Laçın rayon  tam orta  məktəbinin rəhbərliyi və müəllimlər layihənin vacibliyini dönə-dönə vurğulamışdır. Direktor Əzizov Əlipolad  qeyd etmişdir ki, “Ictimai davranış qaydalarının təbliğinə məktəbdən başlayaq!” adlı nəşr edilmiş vəsait müəllimlərə də paylanılacaq və dərs zamanı geniş istifadə olunacaq. Tədbir iştirakçıları mövzunun hazırkı cəmiyyətimiz üçün çox aktual olduğu və həssas bir problem olduğunu nəzərə alaraq  layihənin davamlılığının, daha geniş coğrafiya əhatə etməsinin zərurətini vurğulamışlar. Sonda qeyd etmək lazımdır ki, adıını çəkdiyimiz məktəbin şagirdləri layihəyə daha böyük maraqla yanaşmış, Fond haqqında ətraflı məlumat toplamış və nəşr olunmuş dərgiyə böyük maraq göstərmişlər. Bununla da, “İctimai davranış qaydalarının təbliğinə məktəbdən başlayaq” layihəsi öz işini uğurla başa vurmuşdur.