Laçın rayonu üzrə 2014-cü ilin I rübündə görülmüş işlər və qarşıda duran vəzifələrlə bağlı geniş yığıncaq keçirilmişdir.
19 aprel 2014-cü il tarixdə Rayon İcra Hakimiyyətində rayon ictimaiyyəti nümayəndələrinin iştirakı ilə “Laçın rayonu üzrə 2013-cü ilin I rübündə görülmüş işlər və qarşıda duran vəzifələr”lə bağlı geniş yığıncaq keçirilmişdir. Yığıncaqdan əvvəl rayon ictimaiyyətinin nümayəndələri tərəfindən Rayon İcra Hakimiyyətinin inzibati binası qarşısında ucaldılmış Ulu öndər Heydər Əliyevin büstü önünə gül dəstələri qoyulmuşdur. Tədbirdə “Laçın rayonu üzrə 2013-cü ilin I rübündə görülmüş işlər və qarşıda duran vəzifələr”lə bağlı məruzə dinlənilmişdir. Ötən dövr ərzində Möhtərəm Prezident İlham Əliyev cənablarının rəhbərliyi altında respublikada və rayonda görülmüş işlər, əldə olunmuş nəailiyyətlər ətraflı təhlil olunmuş, qarşıda duran vəzifələrdən danışılmışdır. Məruzədə Rayon İcra Hakimiyyəti başçısı tərəfindən respublikanın müxtəlif rayon və şəhərlərində 21 yerdə səyyar qəbulların keçirilərək, 3720 nəfər rayon sakininin qəbul edildiyi, sakinlərin problemləri ilə bağlı Azərbaycan Respublikasının Baş naziri, Baş nazirinin müavini, bir sıra Nazirlik və Komitə sədrləri ilə görüşlərin keçirildiyi və bir çox problemlərin həllinə nail olunduğu qeyd edilmişdir. Eyni zamanda bildirilmişdir ki, hesabat dövründə Taxta-körpü qəsəbəsi və məcburi köçkünlərimizin sıx məskunlaşdıqları digər ərazilərdə başlanılmış tikinti-abadlıq işləri davam etdirilir. Ərazinin təbii şəraitinə uyğun 2079 ədəd müxtəlif növ ağac və gül kolları əkilmişdir.
Hesabat dövründə rayonda məcburi köçkünlərin sosial-iqtisadi vəziyyətinin yaxşılaşdırılması istiqamətində bir sıra mühüm tədbirlər keçirilmiş, rayonun maddi cəhətdən imkansız vətəndaşları, şəhid ailələri və Qarabağ müharibəsi əlillərinə diqqət artırılmışdır. Dünya Azərbaycanlılarının Həmrəyliyi günü və Novruz bayramı münasibətilə Azərbaycan Respublikasının Vergilər Nazirliyi tərəfindən Taxtakörpü ərazisində və Ağcabədi şəhərində məskunlaşmış 3490 ailəyə ərzaq yardımı göstərilmişdir. Rayonun daxili imkanları hesabına respublikanın 28 rayon və şəhərində məskunlaşmış 500 şəhid ailəsi, Böyük Vətən və Qarabağ müharibəsi iştirakçısı və əlilinə ərzaq paylanmışdır.
Rayon ərazisində təmir - tikinti və abadlıq işlərinin davam etdirildiyi bildirilmişdir. 2014-cü ilin birinci rübündə Qayğı qəsəbəsində Heydər Əliyev prospektində 1020 m2 istinad divarı hörülmüş, Taxta körpü - Alxaslı, Taxta körpü –Mişni , Arduşlu və Qarakeçdi – Mirik, avtomobil yollarının 24 km hissəsində cari təmir işləri aparılmış, Qayğı qəsəbəsində 800 m 2 sahəsi olan çınqıl örtüklü avtomobil dayanacağı tikilmiş, qəsəbədaxili yolun 2150 m2 hissəsinə çınqıl örtük verilmiş, Heydər Əliyev prospektində aparılan abadlıq nəticəsində yolun genişləndirilmiş 1800 m2 hissəsinin isə asfaltlanma işlərinə başlanılmışdır. 2014-cü ilin birinci rübündə rayon üzrə 65239 nəfər sakinə yemək xərci müavinəti, 3550 nəfərə əmək pensiyası, 1751 nəfərə sosial müavinət və təqaüd ödənilmişdir. Rayon Əhalinin Sosial Müdafiəsi Mərkəzindən 1975 nəfər ailə üzvünü əhatə edən 453 ailə ünvanlı sosial yardım alır ki, ondan 100 ailəyə 2014-cü ilin birinci rübündə təyinat aparılmışdır. Bu da keçən ilin müvafiq dövrünə nisbətən 40 ailə çoxdur. Hazırda hər ailəyə 123 manat, adambaşına 28.15 manat ünvanlı sosial yardım düşür.
Cari ilin birinci rübündə kənd təsərrüfatı sahəsinin də dinamik inkişaf etdiyi bildirilmişdir. Əhali və fermer təsərrüfatlarında 34 663 baş iri buynuzlu, 201 377 baş xırda buynuzlu heyvanlar saxlanılır ki, bu da keçən ilin müvafiq dövrü ilə müqayisədə 653 baş iri, 1 680 baş xırda buynuzlu artıqdır. Həmin təsərrüfatlarda 5 027 sentner süd keçən ilə nisbətən 85 sentner çox, 34 059 sentner süd keçən ilə nisbətən 126 sentner çox, 174 min ədəd yumurta keçən ilə nisbətən 4 min ədəd çox istehsal olunmuşdur. Mal qaraya epizootik plan əsasında vaxtında baytarlıq tədbirləri aparılmış , bunun nəticəsi olaraq heç bir xəstəlik baş verməmişdir.
Hesabat məruzəsində görülmüş işlərlə yanaşı mövcud çatışmazlıqlar da qeyd olunaraq qarşıda duran vəzifələr müəyyənləşdirilmişdir.
Məruzə ətrafında Rayon Təhsil Şöbəsinin müdiri, Rayon Vergilər şöbəsinin müdiri, Rayon Elektrikşəbəkənin müdiri çıxış edərək rəhbərlik etdikləri sahələr üzrə görülmüş işlər və qarşıda duran vəzifələrdən danışılmışdır.
