31 dekabr Dünya Azərbaycanlılarının Həmrəyliyi günü və Yeni il şənliyi qeyd olundu.

29 dekabr 2013-cü il tarixdə  Ağcabədi  rayonunun  Taxtakörpü  qəsəbəsində  Laçın  Rayon  İcra  Hakimiyyətinin,  Rayon   Mədəniyyət və Turizm Şöbəsinin  birgə  təşkilatçılığı  ilə 31 dekabr-Dünya Azərbaycanlılarının Həmrəyliyi günü və Yeni ilin gəlişi münasibətilə bayram tədbiri keçirilmişdir. İlk  öncə tədbir iştirakçıları  Rayon İcra Hakimiyyətinin inzibati binası qarşısındakı  Ulu öndər Heydər Əliyevin büstünü ziyarət etmiş, abidə önünə tər  güllər düzmüşlər.
          Təntənəli bayram  şənliyində iştirak edən Laçın  Rayon  İcra  Hakimiyyətinin başçısı Akif  Səlimov 31 dekabr - Dünya Azərbaycanlılarının Həmrəyliyi günü və Yeni il münasibətilə rayon sakinlərini təbrik etmişdir. 31 dekabr - Dünya Azərbaycanlılarının Həmrəyliyi gününün yaranma tarixinin birbaşa Ulu öndər Heydər Əliyevlə bağlı olduğunu bildirən rayon rəhbəri 1991-ci ilin 16 dekabrında Naxçıvan Muxtar Respublikası Ali Məclisinin sessiyasında Heydər Əliyevin  təşəbbüsü ilə dekabrın 31-nin Dünya Azərbaycanlılarının Həmrəyliyi Günü elan olunmasını xalqımızın tarixində qazanılmış ən böyük nəaliyyət olduğunu bildirmişdir. Beləliklə, bütün azərbaycanlılar üçün əziz olan 31 dekabr - Dünya Azərbaycanlılarının Həmrəyliyi Günü bayram edilir, Azərbaycanlılar bu gün ilə fəxr edir və onu qürurla qeyd edirlər.
Rayon İcra Hakimiyyətinin  başçısı Akif Səlimov eyni zamanda  bildirmişdir ki, xalqımızın milli adət-ənənələrinə 2003-cü ildən başlayaraq, möhtərəm Prezidentimiz cənab  İlham Əliyev yüksək diqqət  və  həssaslıqla yanaşır, bu bayramın  dövlət  səviyyəsində  keçirilməsinə geniş  şərait  yaratmışdır. Rayon İcra Hakimiyyətinin  başçısı çıxışında Heydər Əliyev Fondunun Prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın milli-mənəvi dəyərlərə göstərdiyi hərtərəfli qayğının  da xalqımız tərəfindən rəğbətlə qarşılandığını qeyd etmişdir.
Rayon rəhbəri çıxışında ölkə Prezidenti, Ali Baş Komandan cənab İlham Əliyevin rəhbərliyi altında tezliklə tarixi  torpaqlarımızın yağı düşməndən azad ediləcəyinə,  bütün məcburi köçkünlər kimi laçınlıların da ata-baba yurdlarına qayıdacaqlarına qəti əminliyini bildirmişdir.
Sonra   tədbir  Rayon   Mədəniyyət və Turizm Şöbəsinin  hazırladığı  geniş bayram konserti ilə davam etdirilmişdir. Şaxta baba və qar qızın tədbirdə iştirak edən uşaqlara  hədiyyə paylaması uşaqlar tərəfindən sevinclə qarşılanmışdır.
Tədbirdə səsləndirilən rəngarəng  musiqi nömrələri qəsəbə  sakinlərində yüksək  bayram əhval - ruhiyyəsi yaratmışdır.