Laçınlı gənclərlə görüş keçirilmişdir

22 iyun 2013-cü il tarixdə Taxta körpü qəsəbəsində Ağcabədi və ətraf rayonlarda məskunlaşmış laçınlı gənclərlə   görüş  keçirilmişdir.  Tədbirdən əvvəl laçınlı gənclər Ulu öndər Heydər Əliyevin Rayon İcra Hakimiyyətinin  inzibati binası qarşısında ucaldılmış büstünü və Taxta körpü qəsəbəsində rayon şəhidlərinin adının əbədiləşdirildiyi  xatirə kompleksini ziyarət etmiş,   hər iki abidə önünə tər güllər düzmüşlər.
       Sonra tədbir Rayon İcra Hakimiyyətinin akt zalında davam etdirilmişdir. Dövlət  himninin səsləndirilməsi ilə  başlayan  tədbiri  Rayon İcra Hakimiyyətinin başçısı  Akif Səlimov  açaraq giriş sözü ilə çıxış etmişdir.  Ulu Öndər Heydər Əliyevin   gənclərə olan diqqət  və qayğısından danışan rayon rəhbəri,   bu gün bu sahədə Ölkə Prezidenti cənab İlham Əliyevin rəhbərliyi ilə görülən işlərlə bağlı geniş məlumat vermişdir.
Tədbirdə “Ulu öndər Heydər Əliyev və Azərbaycan gənclərinin vətənpərvərlik tərbiyəsi” mövzularında  məruzə dinlənilmiş,  əsası Ulu  Öndər Heydər Əliyev tərəfindən qoyulan dövlət gənclər siyasətinin, gənclərə qayğının hazırda   Azərbaycan Respublikasının Prezidenti cənab İlham Əliyev tərəfindən uğurla davam etdirilməsi, dövlət gənclər siyasəti sayəsində əldə edilmiş nailiyyətlər barədə məlumat verilmişdir. 
      Tədbirdə çıxış edən gənclər Ölkə Prezidentinin hərtərəfli diqqət və qayğısı ilə  əhatə olunduqlarını, bundan sonra da  dövlətə və dövlətçiliyimizə sədaqətlə xidmət edəcəklərini, eyni zamanda Azərbaycan Respublikasının Prezidenti, Ali Baş Komandan  cənab İlham Əliyevin apardığı uğurlu daxili və xarici siyasət, qətiyyətli mövqeyi sayəsində doğma torpaqlarımızın tezliklə erməni işğalçılarından azad ediləcəyinə əminliklərini bildirmişlər.
        

(Tədbirdə respublikanın  24 rayon və şəhərdə məskunlaşmış 170 nəfər gənc iştirak etmişdir)