Bu gün Azərbaycan Xalqının Ümummilli lideri, Ulu öndər Heydər Əliyevin anadan olmasının 97-ci ildönümüdür
Bu gün bütün həyatını xalqımızın və dövlətçiliyimizin taleyi ilə sıx bağlamış, müasir Azərbaycan dövlətinin memarı və qurucusu, bənzərsiz şəxsiyyət Heydər Əliyevin anadan olmasının 97-ci ildönümü tamam olur.
Heydər Əlirza oğlu Əliyev 10 may 1923-cü ildə Azərbaycanın ayrılmaz diyarı olan qədim Naxçıvan şəhərində anadan olmuşdur. İlk təhsilini Naxçıvandakı 3 saylı beynəlxalq məktəbdə alan Heydər Əliyev 1939-cu ildə Naxçıvan Pedaqoji Texnikumunu bitirərək Azərbaycan Sənaye İnstitutunun memarlıq fakültəsinə daxil olmuşdur.
II dünya müharibəsinin başlandığı bir dövrdə 1941-ci ildən Naxçıvan Muxtar Respublikasının Daxili İşlər Komissarlığında və Xalq Komissarları Sovetində şöbə müdiri işləyən Heydər Əliyev fitri istedadı, müqayisəedilməz bacarıq və qabiliyyətlərinə görə 1944-cü ildə dövlət təhlükəsizlik orqanlarında işə göndərilmiş, hələ gənc yaşlarında Türkiyə, Pakistan və Əfqanıstanda göstərdiyi fəaliyyətinə görə “Qızıl ulduz” ordeni və ”Döyüş xidmətlərinə görə” medalı ilə təltif olunmuşdur.
Heydər Əliyev 1948-50-ci illərdə Leninqradda, Dövlət Təhlükəsizlik Komitəsinin xüsusi ali məktəbində təhsil almış, Bakıya qayıtdıqdan bir müddət sonra isə Azərbaycan Dövlət Universitetinin tarix fakültəsinə daxil olaraq, 1957-ci ildə bu təhsil ocağını da əla qiymətlərlə bitirmişdir.
1964-cü ildən Azərbaycan SSR Nazirlər Soveti yanında Dövlət Təhlükəsizlik Komitəsinin sədr müavini işləyən Heydər Əliyev 1967-ci ildə Respublika Dövlət Təhlükəsizlik Komitəsinin sədri vəzifəsinə təyin edilmiş, bu sahədə ilk azərbaycanlı olaraq general-mayor rütbəsinə qədər yüksəlmişdir.
Heydər Əliyev hələ gənc yaşlarında hansı yüksək rütbəyə və vəzifəyə malik olmasına baxmayaraq, təhsil aldığı və işlədiyi bütün müəssisələrdə sadə və mehribanlığı, yüksək savadı, qeyri-adi yaddaşı, səlis natiqlik qabiliyyəti ilə hamını heyran edirdi.
Ümumiyyətlə ömrünün 30 ilə yaxın dövrünü Dövlət təhlükəsizlik orqanlarında xidmət edən Heydər Əliyev istər əks kəşfiyyat bölməsinə rəhbərlik etdiyi illərdə, istərsə də Komitə rəhbərliyinə irəli çəkildiyi 1964-cü ildən sonrakı dövrdə milli kadrların təhlükəsizlik orqanlarına işə cəlb olunması, onların hərtərəfli inkişafı və həlledici sahələrdə rəhbər vəzifələrə təyin edilməsi geniş vüsət almışdır.
Müasir Azərbaycan tarixinin 1969-cu ildən ötən dövrü xalqımızın tarixinə Heydər Əliyev epoxası kimi əbədi həkk olunmuşdur. O da danılmaz həqiqətdir ki, Heydər Əliyev hakimiyyətə gəldiyi həmin illərdə Azərbaycan İttifaq miqyasında inkişaf səviyyəsinə görə aqrar ölkə olmaqla, imperiya hüdudlarında belə tanınmırdı. Bərəkətli torpağı, işgüzar və əməksevər xalqı olan ölkəmizdə işsizlik hökm sürür, respublika bir çox problemlər məngənəsində boğulurdu. Böyük Vətən müharibəsində SSRİ-nin faşizm üzərində qələbəsinin təmin edilməsində ən aparıcı rol oynayan, müharibədə tələb olunan yanacağın 75 faizini verən ölkəmiz dərin böhran keçirirdi.
1969- cu il iyulun 14-də Azərbaycanda rəhbərliyə gələn Heydər Əlirza oğlu Əliyev respublikada hakimiyyətdə olduğu ilk 14 il ərzində xalqın daxili potensialını üzə çıxardı, onu zirvələrə yüksəldərək dünyaya tanıtdı.
1993-cü ilin iyun günlərində xalqımız ikinci dəfə dövlət müstəqilliyini itirmək təhlükəsi ilə üzləşəndə yenə də böyük oğlu, mahir siyasətçi Heydər Əliyevə üz tutdu. Çünki hələ 1969-1982-ci illərdə respublikaya rəhbərlik edərək Heydər Əliyev bacarıqlı dövlət xadimi kimi xalqının əbədi etimadını qazanmışdı. Ən çətin anda mükəmməl çıxış yolu tapmaq bacarığı Allahın bu dahi şəxsiyyətə bəxş etdiyi bir istedad idi.
Doğma xalqının mənafeyini hər şeydən üstün tutan müdrik siyasətçi bu müraciətə etinasız qalmadı. O çətin məqamda tarixi məsuliyyəti öz üzərinə götürərək xalqımızı və dövlətimizi labüd təhlükədən xilas etdi.
Bir sözlə Heydər Əliyevin hakimiyyətə ilk gəlişi Azərbaycanda milli dirçəlişin başlanğıcını qoymuşdursa, onun 1993-cü il iyunun 15-də ikinci gəlişi haqlı olaraq milli «Qurtuluş dövrü” kimi tariximizə həkk olundu.
Ümummilli liderimiz Heydər Əliyevin xalqımız qarşısında ən böyük xidmətlərindən biri də Azərbaycan xalqı, Azərbaycan dövləti üçün İlham Əliyev kimi geniş dünyagörüşə, mətin iradəyə yüksək birlik və bacarığa malik vətənpərvər övlad tərbiyə etməsi və yetişdirməsidir. Bu gün anadan olmasının 97-ci ildönümü tamam olan Azərbaycan Xalqının Ümummilli lideri, Ulu öndər Heydər Əliyevin aramızda cismən olmaması Azərbaycan Xalqı üçün nə qədər ağırdırsa, İlham Əliyev kimi bacarıqlı bir dövlət başçısının Heydər Əliyev siyasi kursunu layiqincə davam etdirməsi ən böyük səadətdir. Çünki, Azərbaycanda hüquqi dövlətin banisi, ömrünün 40 ilə yaxın bir müddətini xalqımızın taleyi ilə sıx bağlayan Ulu öndər Heydər Əliyevin müəyyən etdiyi strateji xəttin onun siyasi kursunun əzmkar davamçısı ölkə Prezidenti cənab İlham Əliyev tərəfindən müasir dövrün tələblərinə uyğun səviyyədə uğurla həyata keçirilməsi nəticəsində ölkəmiz bu gün misli görünməyən sürətli inkişaf dinamikası əldə edərək regionun lider dövlətinə çevrilmişdir.
